राज्य शासनाने गणेश मुर्तीच्या उंचीसंदर्भात घेतलेला निर्णयाचा पुनर्विचार करावा असे आवाहन कुंभार समाज सामाजिक संस्थेचे महाराष्ट्र प्रदेशाध्यक्ष, राष्ट्रवादी काँग्रेस पार्टी ओबीसी सेलचे प्रदेश उपाध्यक्ष सतिश दरेकर यांनी मुख्यमंत्री उद्धव ठाकरे व उपमुख्यमंत्री अजितदादा पवार यांना केले आहे. मार्गदर्शक सुचना निर्णय राज्यातील कुंभार समाजाला उध्वस्त करणार ठरणार असल्याचेहि त्यांनी सांगितले.
राज्य शासनाने सार्वजनिक गणेशोत्सवाच्या गणेश मुर्तींची उंची चार फुट तर घरगुती गणेशोत्सवाच्या गणेश मुर्तींची उंची दोन फुट ठेवावी असे आदेश काढले आहेत. या संदर्भातील आदेश गृह विभागाचे प्रधान सचिव (विशेष) यांनी पारित केला आहे.
सतिश दरेकर या संदर्भात म्हणाले की, गणेश मुर्तीच्या उंचीबाबतचे आदेश दिले आहेत. राज्य शासनाच्या या आदेशाला उशीर झाला आहे. ऑगस्ट महिन्यात गणेशोत्सव असल्याने कुंभार समाज उत्सवाच्या आधी आठ ते दहा महिने मुर्ती तयार करण्याचे काम करत असतात. यासाठी मुर्तीकार मोठ्या प्रमाणात कर्जे घेत असतात. सद्य स्थितीत कोरोनामुळे कुंभार समाज आधिच मोठ्या आर्थिक संकटात सापडला आहे.
शासनाच्या गणेश मुर्तींच्या या आदेशामुळे तयार केलेल्या मुर्ती विकल्या जाणार नाहीत व राज्यातील कुंभार समाज मोठ्या अर्थिक संकटात सापडून पूर्णतः उध्वस्त होईल यामुळे या मार्गदर्शक सुचना निर्णयातील क्र. तीनच्या मुद्याचा शासनाने फेरविचार करावा व क्र. 3 ची अंमलबजावणी या वर्षी करु नये. अशी विनंती दरेकर यांनी शासनाला केली आहे.