कोल्हापूर- शिवसेना खासदार संजय राऊत यांच्या पत्नी वर्षा राऊत यांना सक्तवसुली संचालनालयाने (ईडी) नोटीस पाठवली. वर्षा राऊत यांनी पंजाब महाराष्ट्र सहकारी बँक खात्यातून संजय राऊतांच्या सहकाऱ्यासोबत केलेल्या 55 लाखांच्या व्यवहाराप्रकरणी ईडीने नोटीस पाठवली आहे.
शिवसेना खासदार संजय राऊत यांच्या पत्नीला ईडीचे नोट्स आल्याने राजकीय वर्तुळात खळबळ उडाली आहे. “ज्या पद्धतीने सीबीआयला महाराष्ट्रात तपास करायचा असेल तर परवानगी घ्यावी लागते. तसाच निर्णय ईडीबाबतही घेण्याची गरज आहे,” असे मत राज्याचे ग्रामविकासमंत्री हसन मुश्रीफ यांनी व्यक्त केलं. ते पत्रकारांशी बोलत होते.
“ईडीचा वापर चुकीच्या पद्धतीने होत आहे. सुरुवातील राष्ट्रवादीचे अध्यक्ष शरद पवार यांना ईडीची नोटीस देण्यात आली. त्यानंतर मलाही नोटीस दिली. एकनाथ खडसे यांनाही नोटीस दिली आहे. त्यांनतर संजय राऊत यांच्या पत्नी यांनादेखील ईडीने नोटीस दिली आहे. हे सर्व सूडबुद्धीने होत आहे. ज्या पद्धतीने सीबीआयला महाराष्ट्रात परवानगीशिवाय येता येणार नाही, असं न्यायालयाने सांगितलेलं आहे. तसाच निर्णय ईडीबाबतही घेण्याची गरज आहे. सध्या जे काही सुरु आहे त्यावरुन लोक ईडीविरोधात रस्त्यावर उतरतील अशी परिस्थिती आहे,” असे हसन मुश्रीफ म्हणाले.