पाटणा : पंतप्रधान मोदी यांच्या पोस्टरचा वापर प्रचारासाठी करण्यात आला तर त्यांच्याविरोधात गुन्हा दाखल करण्यात येईल, असा धमकीवजा इशाराच भाजपकडून देण्यात आलाय. बिहारमध्ये विधानसभा निवडणुकीचा धुरळा उडालाय. बिहार विधानसभेसाठी सत्ताधारी राष्ट्रीय लोकशाही आघाडीचं जागावाटप निश्चित झाल्याची घोषणा दोन्ही पक्षांकडून मंगळवारी करण्यात आली. यात संयुक्त जनता दल १२२ तर १२१ जागांवर भाजप आपलं भविष्य आजमावणार आहेत. यानंतर भाजपकडून नितीश यांच्या नेतृत्वावरून नाराजी व्यक्त करीत एनडीएतून बाहेर पडलेल्या ‘लोक जनशक्ती पक्षा’सहीत इतर विरोधी पक्षांविरोधात कडक भूमिका घेण्यात आली आहे.
भाजप – जेडीयू जागावाटप
‘एनडीए’तील प्रमुख पक्ष असलेल्या ‘जेडीयू’ आणि भाजपनं मंगळवारी जागावाटप जाहीर केलंय. ‘बिहार विधानसभेच्या एकूण २४३ जागांपैकी १२२ जागांवर ‘जेडीयू’ आणि १२१ जागांवर भाजप निवडणूक लढविणार आहे. ‘जेडीयू’च्या वाट्यातील सात जागा जीतनराम मांझी यांच्या हिंदुस्थानी अवाम मोर्चा या पक्षाला देण्यात येणार आहेत. तर, भाजपच्या वाट्यातून जागा देण्याबाबत ‘विकासशील इन्सान पक्षा’शी चर्चा सुरू आहे,’ असे नितीशकुमार यांनी म्हटलंय. नितीश यांच्या नेतृत्वावरून नाराजी व्यक्त करीत ‘लोक जनशक्ती पक्ष’ बाहेर पडला आहे. परंतु, या बैठकीत बिहारमध्ये नितीश हेच ‘एनडीए’चे नेते असल्याचं भाजपनं स्पष्ट केलंय. या वेळी लोक जनशक्ती पक्षाचे अध्यक्ष चिराग पासवान यांच्यावर निशाणा साधताना ‘मी रामविलास पासवान यांचा खूप आदर करतो, त्यांच्या प्रकृतीसाठी प्रार्थना करतो. रामविलास पासवान हे ‘जेडीयू’च्या मदतीशिवाय राज्यसभेत गेले का? बिहारमध्ये त्यांचे केवळ दोनच सदस्य आहेत ना? असा सवाल नितीश यांनी केला आहे.
भाजपचे प्रदेशाध्यक्ष संजय जयस्वाल यांनी एका प्रश्नाचं उत्तर देताना ही प्रतिक्रिया दिलीय. या अगोदर भाजप-जदयू च्या पत्रकार परिषदेदरम्यान उपमुख्यमंत्री सुशील कुमार मोदी यांनीही हेच म्हटलं होतं. कोणत्याही पक्षाकडून पंतप्रधान मोदी किंवा पक्षाच्या इतर स्टार प्रचारकाच्या पोस्टरचा वापर करताना आढळला तर निवडणूक आयोगाकडे याची तक्रार केली जाईल व याविरोधात कारवाई निश्चित केली जाईल, असं त्यांनी म्हटलं होतं.
बिहार भाजपाच्या अनेक नाराजांनी लोक जनशक्ती पक्षात दाखल होण्याचा धडाका लावलाय. अगोदर भाजपचे उपाध्यक्ष राजेंद्र सिंह लोजपात दाखल झाले, त्यानंतर माजी आमदार उषा विद्यार्थी यांनीही लोजपाची वाट धरली. यानंतर, बिहारमध्ये भाजपचे निवडणूक प्रभारी आणि महाराष्ट्राचे माजी मुख्यमंत्री देवेंद्र फडणवीस यांनी पक्षाविरोधी कारवाया खपवून घेतल्या जाणार नाहीत, असा सज्जड इशारा दिला आहे.
Read Also ;
राष्ट्रवादी देखील बिहार निवडणुकीच्या रिंगणात ! जाहीर केलेल्या स्टार प्रचारकांच्या यादीत कोल्हे आणि मिटकरींना स्थान नाही https://t.co/8r9l2zhiIk#AmolKolhe #AmolMitkari #BiharElection2020 #NCP
— Political महाराष्ट्र (@PoliticalMH) October 7, 2020