नवी दिल्ली : तेलंगणा विधानसभा निवडणुकीत काॅंग्रेसने बीआरएसला धोबीपछाड दिलं. काॅंग्रेस तेलंगणात १९९ विधानसभा जागांपैकी ६४ जागांवर दणदणीत विजय मिळवला. तर बीआरएसच्या वाट्याला फक्त ३९ जागा आल्या. परंतु या निवडणुकीत भाजपच्या एका उमेदवारीची जोरदार चर्चा सुरू आहे. कारण भाजपच्या उमेदवाराने भावी मुख्यमंत्री आणि विद्यमान मुख्यमंत्र्यांचा पराभव केला आहे. २०१८ च्या निवडणुकीत कामारेड्डी मतदारसंघात बीआरएसचे उमेदवार गम्पा गोर्वधन यांनी मिळवला होता. त्यांनी काॅंग्रेसचे मोहम्मद अली शब्बीर यांचा पराभव केला होता. तर २०१४ च्या निवडणुकीत या मतदारसंघ काॅंग्रेसला मिळाला होता. मात्र २०२३ मध्ये यावर आता भाजपने कब्जा केलाय.
तेलंगणाचे मुख्यमंत्री के चंद्रशेखर राव आणि काॅंग्रेसचे प्रदेशाध्यक्ष रेवंत रेड्डी यांनी कामारेड्डी या मतदारसंघातून निवडणुक लढविली होती. त्याच मतदारसंघातून भाजपकडून वेंकट रमण रेड्डी यांना उमेदवारी देण्यात आली होती. काॅंग्रेसने संपुर्ण तेलंगणात धक्कादायक निकाल दिला. परंतु कामारेड्डी मतदारसंघात वेंकट रमण रेड्डी हे जायंट किलर ठरले आहे. त्यांनी २०२३ च्या विधानसभा निवडणुकीत तेलंगणाचे मुख्यमंत्री केसीआर राव यांचा तीन हजाराहून अधिक मतांनी पराभव केला. तर काॅंग्रेसचे भावी मुख्यमंत्री म्हणून गणले जाणारे रेवंत रेड्डी हे तिसऱ्या क्रमांकावर राहिले आहेत.
५३ वर्षीय कटिपल्ली वेंकट रमण रेड्डी व्यावसायिक असून त्यांनी केवळ १२ पर्यंत शिक्षण घेतलेय. निवडणुक अर्जात घोषित केलेल्या संपत्ती विवरणात त्यांच्याकडे फक्त ५० कोटींची संपत्ती असून व्यावसायिक ते राजकीय नेते बनलेल्या रेड्डी यांनी राज्याच्या मुख्यमंत्र्यांसह भावी मुख्यमंत्र्यांना पराभवाची धुळ चारली आहे. त्यामुळे त्यांची राजकीय वर्तुळात एकच चर्चा सुरू आहे.
रेड्डी यांच्यावर आतापर्यंत ११ गुन्हे दाखल असून कामारेड्डी विधानसभा मतदारसंघात अनेक शाळा व रूग्णालये त्यांनी सुरू केली आहेत. याच कारणामुळे त्यांनी दिग्गज नेत्यांवर बाहुबली विजय मिळवला आहे. यातच रेड्डी यांच्या विजयामुळे सोलापुरच्या एका तरूणाचा मोलाचा वाटा राहिला आहे. सचिन कल्याण शेट्टीं असे त्याचे नाव असून प्रचार प्रमुखपदाची जबाबदारी त्यांच्यावर सोपवली होती. मतदारसंघात तब्बल दोन महिने तेथेच तळ ठोकला होता. याकाळात त्यांनी मतदारांच्या प्रत्यक्ष गाठीभेटी, सभा घेत पुर्ण प्रचार यंत्रणा राबविली होती.