पुणे – संपूर्ण महाराष्ट्रात काल ग्रामपंचायत निवडणूक निकालाची उत्सुकता होती. त्यामुळे गल्लीपासून ते दिल्लीपर्यंत सर्वांचे त्याकडे लक्ष लागले होते. निकाल लागले आणि त्यानंतर एकच जल्लोष सुरू झाला. तसेच घरोघरी आपापल्या परीने आनंद उत्सव साजरा करत होते. गुलाल उधळला जात होता.
पुणे जिल्ह्यातील ग्रामपंचायत मध्ये पतीने विजय मिळविल्यानंतर आनंदी पत्नीने चक्क पतीला खांद्यावर उचलून घेत त्याची गावभर मिळेल मिरवणूक काढली. या सर्व प्रकाराचा व्हिडिओ सध्या सोशल मीडियावर चांगलाच व्हायरल होतोय.
खेड तालुक्यातील पाळू गावात जाखमाता देवी गावात ग्रामविकास पॅनल सात जागांपैकी सहा जागांवर वर्चस्व मिळवले. या विषयात मोठा वाटा होता तो गावातील महिलांचा त्यामुळे आपल्या विजयाचा जल्लोष साजरा करत असताना गावातील विजयी उमेदवारांच्या पत्नीने पतीला खांद्यावर उचलून घेत त्याची मिरवणूक काढली.
संतोष शंकर गुरव यांनी 221 मत मिळवत विरोधातल्या उमेदवाराचा पराभव केला. आनंदाच्या भरात पत्नी रेणुकाने त्यांना खांद्यावर उचलून घेत त्याची गावभर मिरवणूक काढली. सध्या त्यांचे फोटो आणि व्हिडिओ सोशल मीडिया मध्ये चांगलेच व्हायरल होत आहे. अनेकांनी पत्नीच्या खमकेपणाचे कौतुक करताना संतोष गुरव यांना विजयाच्या शुभेच्छा देखील दिल्या.