मुंबई : नवी मुंबई उभारण्यात येत असलेल्या आंतरराष्ट्रीय विमानतळाला हिंदूहृदयसम्राट बाळासाहेब ठाकरे यांचे नाव देण्याची मागणी पुढे आली आहे. यासंदर्भात नगरविकास मंत्री आणि ठाण्याचे पालकमंत्री एकनाथ शिंदे यांनी मुख्यमंत्री उद्धव ठाकरे यांना निवेदन दिले आहे.
शिवसेनाप्रमुख हिंदुहृदयसम्राट बाळासाहेब ठाकरे यांच्या स्वप्नातला महाराष्ट्र घडवण्यासाठी सरकार अनेक महत्त्वाचे निर्णय घेत आहे. कोरोनाच्या कठीण काळातही राज्याच्या विकासाच्या गाडीचा वेग मंदावू न देण्याची दक्षता घेण्यात आली. यामुळेच राज्यात उद्योग क्षेत्राशी निगडीत असे 61 हजार कोटींचे सामंजस्य करार करण्यात आले आहेत, असे एकनाथ शिंदे यांनी आपल्या निवेदनात म्हटले आहे.
#नवीमुंबई येथील प्रस्तावित विमानतळाला #हिंदूहृदयसम्राट #शिवसेनाप्रमुख #बाळासाहेब_ठाकरे यांचे नाव देण्यात यावे याकरिता राज्याचे मुख्यमंत्री सन्माननीय उद्धवजी ठाकरे साहेब यांना निवेदन सादर केले.#NaviMumbaiAirport #Hinduhrudaysamrat #BalasahebThackeray@CMOMaharashtra @OfficeofUT pic.twitter.com/YPNAVtpWl1
— Eknath Shinde – एकनाथ शिंदे (@mieknathshinde) December 28, 2020
महाराष्ट्रात विविध विकास प्रकल्पांची कामे धडाक्यात सुरू आहेत. यातीलच नवी मुंबई आंतरराष्ट्रीय विमानतळाच्या प्रकल्पाचे काम सिडकोच्या माध्यमातून प्रगतिपथावर आहे. निर्धारित वेळेत हे विमानतळ जनतेच्या सेवेत रूजू करण्यासाठी सिडको कटिबद्ध आहे. या विमानतळाला हिंदुसदयसम्राट बाळासाहेब ठाकरे यांचे नाव देण्यात यावे, अशी मागणी शिंदे यांनी केली आहे.
हिंदुहृदयसम्राट बाळासाहेब ठाकरे यांचे महाराष्ट्राच्या जडणघडणीत मोठे योगदान आहे. मराठी माणसाला आत्मभान देण्याचे काम बाळासाहेबांनी केले. मराठी माणसाला उत्तुंग झेप घेता यावी, यासाठी त्याच्या पंखात बळ भरण्याचे काम बाळासाहेबांनी केले. त्यामुळे अशा उत्तुंग नेत्याचे नाव नवी मुंबई आंतरराष्ट्रीय विमानतळाला देणे हा त्या वास्तूचा गौरव करण्यासारखे आहे. असे नामकरण करण्याबाबत राज्य शासनाच्या वतीने केंद्र शासनाकडे प्रस्ताव पाठविण्यात यावा, असे शिंदे यांनी आपल्या निवेदनात म्हटले आहे.